Starv sum KT-grannskoðari

Januar leitar eftir einum dugnaligum starvsfelaga til okkara KT-deild, við starvsbyrjan eftir summarferiuna 2025.

Hevur tú serligan áhuga fyri KT og ynskir at arbeiða við KT-grannskoðan, umframt at hjálpa feløgum og almennum myndugleikum við at styrkja um teirra nettrygd og dátuvernd? So er at lesa meira um, hvørjir møguleikar eru við einum spennandi starvi innan KT-grannskoðan og ráðgeving hjá Januar.

Vælkomin á Januar

Januar er eitt grannskoðanar- og ráðgevingarvirki, sum veitir grannskoðan og virkistænastur til fyritøkur og almennar myndugleikar í øllum støddum. Á Januar raðfesta vit ikki einans fakligan kunnleika, men vit leggja stóran dent á samanhald, eina sterka virkismentan og persónligar førleikar, sum hava avgerandi týdning fyri eitt gott og varandi kundasamband.

Tín leiklutur sum KT-grannskoðari

Sum KT-grannskoðari hjá Januar verður tú partur av einum toymi, sum arbeiðir miðvíst og skipað í tøttum samstarvi við dugnaligum starvsfeløgum, umframt leiðslu og KT-leiðarum hjá okkara kundum. Tú kemur skjótt í gongd og verður partur av uppgávum, har tín áhugi fyri KT og tínir førleikar at skapa eitt gott samstarv kunnu gera ítøkiligan mun.

Arbeiði á KT-deildini hjá Januar umfatar millum annað, at:

• KT-grannskoðan: Gjøgnumganga, testa og meta um KT-fyriskipanir, trygdartiltøk og skipanir við støði í ISO/IEC 27001 og øðrum viðkomandi standardum og lógarkrøvum.
• Leiðsla av KT-trygd: Hjálpa kundum at menna strategiskar leiðsluskipanir og mannagongdir fyri KT-trygd við støði í virkistørvinum hjá kundanum.
• Nettrygd og váðastýring: Eyðmerkja hóttanir og veikleikar, og ráðføra um loysnir og trygdartiltøk, sum styrkja um nettrygdina.
• Dátuvernd: Hjálpa kundum at kortleggja teirra viðgerð av persónupplýsingum, eyðmerkja møguligar manglar og vegleiða um praktiskar loysnir, sum tryggja at dátuverndarlógin kann haldast.

Hvørjum leita vit eftir?

Vit leita eftir einum ágrýtnum starvsfelaga, sum ynskir at læra meira um KT-grannskoðan og ráðgeving innan nettrygd og dátuvernd. Fyritreytirnar fyri starvinum sum KT-grannskoðari hjá Januar eru, at:

• Tú ert álitisvekjandi og hevur lætt at samskifta við viðskiftafólk og starvsfelagar.
• Tú hevur tekniskan kunnleika og áhuga fyri KT-grannskoðan og nettrygd.
• Tú ert til reiðar at læra um ISO/IEC 27001, aðrar viðkomandi standardar og lóggávu.
• Tú hevur viðkomandi miðnámsútbúgving.
• Um tú hevur eina bachelor í KT-verkfrøði ella líknandi, kann hetta verða ein fyrimunur, men ikki eitt krav.

Eftirútbúgving

Vit raðfesta eftirútbúgving og viðurkenna, at arbeiðið innan KT-grannskoðan er bæði fjølbroytt og í støðugari menning. Samstundis sum tú arbeiðir, stuðla vit tær við eftirútbúgving innan viðkomandi øki, so sum KT-grannskoðan og váðastýring, nettrygd, trygd í cloud-umhvørvum, dátuvernd ella økjum, sum eru viðkomandi fyri teg og starvið.

Umsókn

Umsókn: Umsókn saman við lívsrensl, prógvi og próvtølum frá tínari fyrrverandi ella núverandi útbúgving, sum verður lokin í summar, kann sendast í telduposti á januar@januar.fo innan 5. mai 2025.‍

Starvsbyrjan: 1. september 2025 ella eftir nærri avtalu.

Spurningar: Hevur tú spurningar um starvið, ert tú vælkomin til at seta teg í samband við Jóhan Martin Jacobsen á tlf. 551740 ella jmj@januar.fo.

Allir fyrispurningar og umsóknir verða viðgjørd í trúnaði.

‍